राजनीतिक नियुक्तिमा कंग्रेसले एकलौटी गरेको भन्दै एमालेको कार्यदल गठन

भदौ १०

सत्तारुढ नेपाली कंग्रेसले राजनीतिक नियुक्तिमा एकलौटी निर्णय गरेको आरोप लगाउँदै एमालेले प्रधानमन्त्री सुशील कोइरालासँग छलफल गर्न कार्यदल नै गठन गरेको छ । सरकार गठन भएदेखि नै राजनीतिक नियुक्तिमा सार्वजनिक रुपमा आपत्ति जनाउँदै आएको एमालेले विश्वविद्यालयमा भएको नियुक्तिपछि प्रधानमन्त्रीसँग छलफल गर्न कार्यदल गठन गरेको हो । प्रचार विभाग प्रमुख योगेश भट्टराईका अनुसार, नेपाली काङ्ग्रेसबाट भइरहेका निर्णयहरू संयुक्त सरकारको आचारसंहिता र सहकार्यको संस्कृति अनुरूप नरहेको ठहर गर्दै यसबारेमा गम्भीर छलफल गरी आवश्यक निर्णयमा पुग्न कार्यदल बनाइएको हो । कार्यदलमा नेता माधवकुमार नेपाल, गृहमन्त्री वामदेव गौतम, महासचिव ईश्वर पोखरेल, उपमहासचिव विष्णुप्रसाद पौडेल तथा सचिव भीम आचार्य छन् । एमालेको स्थायी समितिको बैठकले राजनीतिक नियुक्तिमा असन्तुष्टी जनाएको हो । यस्तै बैठकले संविधान निर्माणमा असन्तुष्ट पक्षको जायज माग सम्बोधन गर्न पार्टीले आवश्यक पहल कदमी लिने निर्णय गरेको छ । एमालेले कार्यकर्तालाई सामाजिक सद्भाव विथोल्ने गतविधीमा संलग्न नहुन पनि निर्देशन दिएको छ ।