चीनमा भएको विस्फोटको अध्ययनका लागि दुई सय सैनिक खटाइयो

श्रावण २९ 

चीनको उत्तरी थियान्चिन सहरमा रासायनिक सामान राखेको एक गोदाममा विस्फोट हुँदा ५० जना मारिएको घटना अध्ययन गर्न दुई सयजना सैनिक विशेषज्ञ टोली पठाइएको छ । स्थल सैन्य टोलीले उक्त क्षेत्रको सफाइ् पनि गर्ने छन् । विस्फोटबाट तीन हजार पाँच सय मानिस घरबारविहीन भएका छन् । विस्फोटमा सात सयभन्दा बढी घाइते भएका छन् । खतरनाक तथा रासायनिक सामान भन्डारण गरिएको भवनमा भएको विस्फोटको कारण अझै पत्तो लाग्न सकेको छैन । घटनाको २४ घन्टासम्म पनि उद्धार र आगो नियन्त्रण गर्न उद्धार टोलीलाई गाह्रो परेको चिनियाँ समाचार संस्था ‘सिन्ह्वा’ले जनाएको छ । सोडियम साइनाइड र टोलुइन डायसोसाएनेट जस्तो खतरनाक रासायन राखिएको गोदाममा विस्फोट हुँदा यो क्षति भएको हो । विस्फोटको कारण दुई किलोमिटर वरपरको क्षेत्रका भवन र सवारी साधन ध्वस्त भएका छन् । विस्फोटको धक्का कैयौं किलोमिटर परसम्म महसुस गरिएको थियो । घटनाको निष्पक्ष जाँच गरिने चिनियाँ प्रधानमन्त्री ली खछियाङले विश्वास दिलाएका छन् । १७ जना दमकलकर्मी मारिएको उक्त घटनामा अझै थुप्रै व्यक्ति बेपत्ता रहेको बताइएको छ ।